𑃟𑃥𑃘𑃒𑃢𑃙 𑃢𑃒𑃤𑃝𑃙𑃢

𑃟𑃥𑃘𑃒𑃢𑃙 𑃢𑃒𑃤𑃝𑃙𑃢 𑃟𑃥𑃘𑃒𑃢𑃙 𑃚𑃢𑃙 𑃒𑃝𑃢𑃐𑃥𑃑𑃣? 𑃢𑃙𑃤𑃙 𑃢𑃒𑃢𑃝𑃢𑃙 𑃤𑃑𑃤𑃙? 𑃢𑃙𑃤𑃙 𑃠𑃣𑃙 𑃠𑃥𑃖𑃘𑃣 𑃕𑃢𑃘𑃣 𑃖𑃣𑃣𑃗 𑃑𑃤𑃙? 𑃠𑃢𑃒𑃢 𑃢𑃔𑃗𑃒𑃢 𑃟𑃙 𑃟𑃥𑃘𑃒𑃢 𑃢𑃟𑃑𑃢𑃝𑃗. 𑃖𑃙𑃝𑃢𑃙𑃠𑃤 𑃢𑃥𑃕𑃝𑃘𑃤𑃗 𑃒𑃝𑃢𑃐𑃥𑃑𑃢𑃜. 𑃢𑃒𑃤𑃙𑃔𑃣𑃙 𑃟𑃤𑃙𑃑𑃦𑃘𑃦𑃒𑃢𑃙 𑃟𑃥𑃘𑃒𑃢𑃙 𑃒𑃝𑃢𑃐𑃥𑃑𑃣 𑃢𑃕𑃢𑃖𑃑𑃣 𑃒𑃤𑃡𑃔𑃦 𑃡𑃣𑃙 𑃟𑃤𑃙𑃑𑃦𑃘𑃦𑃒𑃢𑃙 𑃢𑃔𑃢𑃟𑃥𑃙𑃢𑃜. 𑃐𑃤𑃤𑃗 𑃘𑃤𑃗𑃒𑃤𑃙 𑃔𑃟𑃥𑃑𑃤𑃙𑃢𑃜. 𑃡𑃣𑃙 𑃥𑃛𑃥𑃗𑃑𑃖 𑃢𑃔𑃔𑃗𑃢𑃓𑃦𑃝𑃤𑃑𑃝𑃦𑃡𑃣𑃙. 𑃡𑃣𑃙 𑃢𑃜𑃤𑃗𑃑𑃣 𑃢𑃐𑃤𑃗 𑃢𑃠𑃤𑃔𑃢𑃗 𑃠𑃢𑃕𑃢𑃙 𑃡𑃢𑃗𑃘𑃢𑃡𑃣𑃙𑃔𑃣𑃙 𑃟𑃙𑃑𑃣 𑃢𑃐𑃤𑃤𑃗 𑃕𑃙𑃘𑃣 𑃜𑃤𑃝𑃑𑃣. 𑃒𑃢𑃝 𑃔𑃠𑃤𑃗 𑃔𑃣𑃘𑃤𑃠𑃢 𑃢𑃔𑃐𑃢𑃙𑃢𑃜. 𑃖𑃦𑃜𑃙𑃢𑃠𑃢 𑃝𑃒𑃑𑃤 𑃢𑃕𑃦𑃗𑃤𑃡𑃠𑃤. 𑃦𑃟𑃤𑃜 𑃖𑃢𑃙𑃙𑃤𑃡 𑃛𑃥𑃐𑃤𑃑𑃤𑃡𑃠𑃤. 𑃡𑃣𑃙 𑃢𑃔𑃟𑃥𑃑𑃢𑃡𑃣𑃙 𑃢𑃐𑃤𑃤𑃗 𑃢𑃖𑃙𑃝𑃢𑃠𑃤 𑃟𑃦𑃐𑃑𑃨𑃦 𑃘𑃤𑃙 𑃢𑃕𑃥𑃝𑃑𑃣𑃙𑃠𑃤 𑃢𑃕𑃙𑃝𑃥𑃥𑃝 𑃢𑃒𑃤𑃑𑃑𑃤 𑃢𑃔𑃝𑃒𑃢 𑃘𑃣𑃒𑃥 𑃘𑃦𑃢𑃨𑃔𑃤 𑃠𑃥𑃖𑃘𑃣 𑃕𑃢𑃘𑃣 𑃔𑃢𑃟𑃥𑃑𑃤𑃙𑃢𑃜. 𑃖𑃙𑃝𑃢 𑃢𑃔𑃦𑃦𑃗 𑃢𑃖𑃝𑃣𑃗𑃙𑃢 𑃢𑃔𑃐𑃤𑃔𑃤𑃑𑃢𑃤. 𑃣𑃝 𑃐𑃤𑃙𑃝𑃤 𑃟𑃢𑃛𑃛𑃝𑃤, 𑃣𑃝 𑃐𑃤𑃤𑃗, 𑃣𑃝 𑃟𑃝𑃥𑃗, 𑃣𑃝 𑃐𑃜𑃥𑃔𑃢𑃕𑃤 𑃢𑃔𑃐𑃣𑃑𑃢𑃜. 𑃖𑃙𑃝𑃢 𑃕𑃢𑃖𑃑𑃣 𑃔𑃢𑃠𑃤𑃗 𑃢𑃒𑃢𑃝𑃢 𑃘𑃤𑃙𑃢𑃠𑃢 𑃕𑃙𑃔𑃝𑃥𑃥𑃝𑃙 𑃢𑃐𑃥𑃙 𑃢𑃡𑃢𑃗𑃑𑃢𑃜. 𑃢𑃡𑃢𑃗𑃑𑃢𑃡𑃣𑃙 𑃢𑃕𑃙𑃝𑃥𑃥𑃝 𑃕𑃢𑃕𑃢 𑃙𑃢𑃘𑃤𑃗𑃙 𑃢𑃠𑃝𑃕𑃤𑃘𑃣𑃙 𑃕𑃢𑃖𑃑𑃣. 𑃒𑃤𑃡𑃐𑃦 𑃟𑃙𑃣𑃙𑃣𑃕𑃢𑃖 𑃤𑃑𑃤𑃙 𑃓𑃢𑃙 𑃔𑃣𑃑𑃣 𑃢𑃕𑃕𑃢𑃘𑃖𑃣. 𑃡𑃣𑃙𑃢 𑃐𑃤𑃤𑃗 𑃘𑃤𑃗𑃙𑃠𑃤 𑃢𑃔𑃢𑃟𑃥𑃑𑃤𑃙𑃢𑃡𑃤𑃙 𑃢𑃕𑃢𑃘𑃢𑃖𑃤𑃡 𑃔𑃤𑃜𑃑𑃣 𑃔𑃤𑃙𑃢 𑃐𑃤𑃤𑃗 𑃒𑃤𑃙 𑃖𑃔𑃝𑃗 𑃑𑃤𑃙𑃢𑃜. 𑃢𑃖𑃒𑃤𑃙𑃛𑃢𑃙𑃗 𑃢𑃛𑃥𑃐𑃤𑃑𑃤𑃡, 𑃕𑃙𑃢𑃕𑃢𑃒𑃤𑃙, 𑃒𑃤𑃑𑃤𑃔𑃝𑃒𑃢𑃒𑃤𑃙, 𑃘𑃒𑃦𑃐𑃤𑃖𑃖𑃥𑃒𑃤𑃙 𑃠𑃥𑃖𑃘𑃣 𑃕𑃢𑃘𑃣 𑃝𑃔𑃐𑃥𑃖𑃑𑃢𑃤. 𑃡𑃣𑃙 𑃢𑃒𑃝𑃢𑃐𑃥𑃑𑃢𑃡𑃣𑃙 𑃢𑃐𑃐𑃤𑃗 𑃢𑃡𑃤𑃠𑃠𑃢 𑃐𑃢𑃙𑃑𑃤 𑃢𑃔𑃔𑃢𑃟𑃤𑃣. 𑃢𑃝𑃠𑃦𑃧 𑃝𑃥𑃨𑃔𑃤 𑃢𑃘𑃑𑃤𑃑 𑃤𑃐𑃗𑃕𑃢 𑃒𑃙𑃝𑃢𑃒 𑃔𑃢𑃟𑃥𑃑𑃣. 𑃒𑃢𑃝 𑃝𑃥𑃕𑃢𑃑𑃤𑃠𑃤 𑃝𑃤𑃨𑃔𑃢𑃑𑃤𑃠𑃤. 𑃝𑃤𑃟𑃢𑃝𑃤𑃐𑃦𑃨𑃔𑃢 𑃔𑃣𑃘𑃣 𑃝𑃥𑃐𑃥𑃖𑃑𑃤𑃠𑃤. 𑃡𑃣𑃙 𑃢𑃔𑃢𑃟𑃥𑃑𑃤𑃙𑃢𑃡𑃣𑃙 𑃢𑃐𑃐𑃤𑃗 𑃜𑃢𑃗𑃕𑃢𑃖 𑃔𑃣𑃕𑃦𑃗 𑃝𑃢𑃑𑃥𑃘𑃑𑃣.𑃡𑃣𑃙 𑃢𑃒𑃝𑃢𑃐𑃥𑃑𑃢𑃡𑃣𑃙 𑃢𑃐𑃤𑃤𑃗 𑃢𑃖𑃒𑃐𑃣 𑃢𑃕𑃕𑃙𑃢𑃜. 𑃟𑃢𑃙𑃕𑃢𑃘𑃤 𑃐𑃑𑃑𑃢 𑃢𑃒𑃝𑃤𑃧 𑃔𑃢𑃟𑃥𑃑𑃤. 𑃢𑃖𑃒𑃤𑃙 𑃔𑃢𑃠𑃤𑃗 𑃢𑃖𑃒𑃐𑃣𑃙 𑃢𑃦𑃕𑃘 𑃘𑃣𑃠𑃢 𑃢𑃖𑃒𑃐𑃣𑃙 𑃢𑃗𑃕𑃘𑃙𑃢𑃠𑃢 𑃐𑃢𑃒𑃤𑃡𑃙 𑃣𑃝𑃒𑃗𑃐𑃢 𑃢𑃑𑃐𑃣𑃑𑃢𑃜. 𑃟𑃥𑃘𑃖 𑃒𑃥𑃡𑃢𑃗 𑃒𑃤𑃙𑃠𑃤 𑃢𑃖𑃗 𑃐𑃢𑃘𑃥𑃗 𑃐𑃗𑃢𑃜𑃑𑃒𑃤𑃙. 𑃐𑃢𑃒𑃤𑃗 𑃖𑃙𑃝𑃢 𑃠𑃤 𑃓𑃤 𑃟𑃥𑃙𑃢 𑃖𑃙𑃝𑃢𑃠𑃤 𑃒𑃗𑃐𑃢𑃑𑃤𑃑 𑃕𑃢𑃖 𑃖𑃦𑃜𑃙𑃢𑃠𑃢 𑃐𑃤𑃤𑃗 𑃒𑃤𑃙 𑃢𑃙𑃙𑃤𑃜𑃢𑃠𑃤. 𑃟𑃥𑃘𑃒𑃢𑃙𑃙𑃢 𑃒𑃢𑃑𑃤 𑃕𑃢𑃨𑃔𑃤 𑃢𑃔𑃢𑃟𑃥𑃑𑃤𑃙𑃢𑃙 𑃢𑃖𑃙𑃝𑃢𑃠𑃤 𑃐𑃑𑃑𑃢 𑃤𑃜𑃑𑃢𑃠𑃤. 𑃟𑃥𑃘𑃢𑃒𑃢 𑃠𑃦𑃔𑃨𑃤 𑃖𑃙𑃝𑃢 𑃢𑃔𑃦𑃗 𑃖𑃙𑃝𑃢 𑃢𑃐𑃐𑃤𑃗 𑃣𑃙𑃣𑃕𑃢𑃙 𑃢𑃑𑃐𑃣𑃑𑃣 𑃢𑃔𑃣𑃗 𑃤𑃑𑃤𑃙 𑃓𑃢𑃙 𑃢𑃙𑃤𑃙 𑃢𑃔𑃦𑃗 𑃘𑃥𑃑𑃠𑃤 ? 𑃢𑃡𑃢𑃔𑃨𑃢𑃖 𑃜𑃢𑃙𑃔𑃦 𑃢𑃕𑃕𑃦𑃗𑃤𑃠𑃤? 𑃤𑃠𑃢 𑃟𑃥𑃘𑃒𑃢𑃙 𑃢𑃔𑃥𑃚𑃢𑃝𑃢 𑃣𑃙𑃣𑃕𑃢𑃖 𑃔𑃣𑃑𑃢𑃜 𑃘𑃦𑃕𑃤 𑃣𑃝𑃕𑃘𑃖𑃘𑃤𑃗 𑃘𑃥𑃑𑃑𑃠𑃤. 𑃖𑃙𑃑𑃝𑃖 𑃕𑃘𑃖𑃘𑃤𑃙𑃙𑃠𑃤𑃔𑃣𑃙 𑃜𑃢𑃗𑃕𑃢𑃖 𑃔𑃣𑃕𑃦𑃗 𑃟𑃥𑃘𑃒𑃢𑃙 𑃕𑃦𑃗𑃑𑃠𑃤. 𑃜𑃢𑃗𑃔𑃦 𑃖𑃝𑃣𑃗𑃙𑃢𑃙 𑃢𑃖𑃒𑃐𑃣 𑃕𑃢𑃙𑃢 𑃠𑃥𑃖𑃙𑃢 𑃐𑃢𑃙𑃑𑃤 𑃐𑃢𑃜𑃥 𑃐𑃤𑃤𑃗 𑃟𑃢𑃝𑃥𑃗 𑃒𑃥𑃑𑃤𑃙 𑃢𑃑𑃣 𑃐𑃙𑃢𑃜 𑃐𑃢𑃜𑃑𑃤𑃔 ? 𑃒𑃗𑃐𑃢 𑃢𑃐𑃢𑃜𑃘𑃣𑃙 𑃔𑃣𑃙 𑃟𑃥𑃘𑃒𑃢𑃙 𑃡𑃢𑃔𑃢𑃖 𑃕𑃦𑃗𑃒𑃢.