𑃠𑃦𑃘𑃔𑃢 𑃒𑃥𑃢𑃒

𑃛𑃐𑃤𑃧𑃠𑃤: 𑃢𑃖𑃒𑃤𑃙 𑃢𑃘𑃥𑃗 𑃢𑃘𑃢𑃙 𑃓𑃢𑃘𑃢𑃟 𑃛𑃐𑃤𑃧𑃠𑃤. 𑃢𑃙𑃤𑃙𑃠𑃤 𑃢𑃙𑃦𑃕𑃘𑃘𑃤𑃗𑃙 𑃠𑃤 𑃢𑃙𑃘𑃣𑃙 𑃢𑃗𑃕𑃤𑃧𑃠𑃢 𑃤𑃠𑃠𑃢 𑃠𑃢 𑃢𑃔𑃔𑃣𑃘𑃣𑃙. 𑃓𑃢𑃘𑃢𑃟 𑃢𑃔𑃐𑃣𑃘𑃤𑃙 𑃢𑃙𑃘𑃣𑃙 𑃔𑃠𑃤𑃗𑃙 𑃒𑃞𑃥𑃘 𑃢𑃔𑃐𑃣𑃘𑃤𑃙 𑃒𑃤𑃠𑃢 𑃢𑃒𑃒𑃔𑃨𑃥𑃝 𑃔𑃖𑃑𑃤𑃙𑃠𑃤. 𑃕𑃥𑃝𑃥𑃙 𑃑𑃥𑃖 𑃢𑃙𑃘𑃣𑃙 𑃒𑃞𑃥𑃘 𑃒𑃢𑃝𑃢𑃘𑃣𑃙 𑃝𑃒𑃑𑃤 𑃢𑃕𑃕𑃘𑃢𑃖𑃣. 𑃒𑃤𑃡𑃔𑃦 𑃛𑃐𑃤𑃧𑃠𑃤: 𑃓𑃢𑃘𑃢𑃟 𑃐𑃒𑃒𑃤𑃡 𑃢𑃜𑃖 𑃢𑃒𑃒𑃢𑃝𑃢𑃙𑃣. 𑃢𑃗𑃢𑃙𑃑𑃤 𑃢𑃠𑃢𑃨𑃔𑃤𑃧 𑃝𑃥𑃛𑃛𑃦 𑃕𑃤𑃜𑃑𑃢𑃑𑃣. 𑃢𑃙𑃑𑃢𑃟𑃤𑃔𑃨𑃤𑃗 𑃢𑃔𑃥𑃝𑃒𑃤𑃙 𑃢𑃔𑃣𑃜𑃣. 𑃟𑃙 𑃕𑃤𑃧 𑃒𑃢𑃙𑃦𑃗 𑃓𑃢𑃘𑃢𑃟 𑃒𑃥𑃢𑃒𑃙 𑃜𑃢𑃗 𑃕𑃢𑃖 𑃔𑃣𑃘𑃤. 𑃒𑃥𑃢𑃒𑃙 𑃢𑃘𑃢𑃙 𑃓𑃢𑃘𑃢𑃟. 𑃢𑃙𑃤𑃙 𑃢𑃟𑃖𑃛𑃥𑃗𑃙 𑃢𑃗𑃕𑃤𑃧𑃠𑃢 𑃥𑃛𑃢𑃐𑃦 𑃢𑃔𑃔𑃟𑃥𑃣. 𑃢𑃙𑃤𑃙 𑃒𑃥𑃔𑃔𑃤 𑃢𑃔𑃐𑃣𑃘𑃤𑃙 𑃜𑃢𑃗𑃕𑃢𑃖 𑃔𑃣𑃕𑃦𑃗 𑃠𑃝𑃥𑃖 𑃠𑃥𑃖 𑃙𑃢𑃙 𑃡𑃢𑃗𑃗𑃑𑃣. 𑃒𑃥𑃢𑃒𑃙 𑃑𑃦 𑃢𑃙𑃤𑃙 𑃔𑃥𑃐𑃑𑃨𑃦 𑃒𑃥𑃔𑃞𑃤. 𑃜𑃢𑃗𑃕𑃢𑃖 𑃓𑃢𑃘𑃢𑃟 𑃢𑃔𑃐𑃣𑃘𑃤𑃙𑃢 𑃢𑃒𑃢𑃝𑃢 𑃘𑃤𑃙𑃒𑃤 𑃢𑃙𑃤𑃙 𑃢𑃙𑃦𑃕𑃘𑃙. 𑃒𑃤𑃔𑃤𑃙𑃙𑃢 𑃥𑃝𑃥𑃒𑃜𑃥𑃗𑃙 𑃛𑃔𑃨𑃥𑃝 𑃘𑃥𑃗𑃙 𑃐𑃘𑃥𑃗 𑃔𑃥𑃗𑃘𑃤𑃙 𑃕𑃦𑃝𑃠𑃢𑃗𑃒𑃢𑃙 𑃜𑃤𑃝𑃣𑃑𑃣𑃙. 𑃕𑃤𑃠𑃣𑃑𑃣𑃙 𑃖𑃗𑃕𑃔𑃨𑃢 𑃕𑃖𑃙𑃠𑃤 𑃒𑃦𑃖𑃙𑃔𑃢 𑃢𑃖𑃣𑃙𑃔𑃢 𑃠𑃥𑃖 𑃠𑃥𑃖𑃙𑃢𑃙 𑃝𑃣𑃗𑃘𑃤𑃙 𑃐𑃤𑃤𑃗𑃙 𑃜𑃝𑃑𑃤𑃙𑃠𑃤 𑃖𑃣𑃙𑃔𑃢𑃙𑃠𑃤 𑃠𑃣𑃘𑃠𑃣𑃘 𑃝𑃢𑃙 𑃕𑃤𑃧𑃘𑃣 𑃢𑃙𑃤𑃙 𑃢𑃑𑃦𑃦𑃔𑃘𑃤𑃗𑃙 𑃢𑃐𑃘𑃥𑃗 𑃢𑃦𑃘𑃣𑃙 𑃕𑃢𑃑𑃔𑃘𑃣 𑃦𑃕𑃘𑃣𑃑𑃤𑃙 𑃜𑃢𑃗𑃕𑃢𑃖 𑃟𑃦𑃑𑃤𑃘𑃤𑃗 𑃔𑃠𑃤𑃗𑃑𑃤 𑃠𑃥𑃖𑃑𑃢𑃤. 𑃒𑃤𑃡𑃔𑃦 𑃖𑃗𑃕𑃔𑃨𑃢 𑃕𑃖𑃙 𑃢𑃕𑃥𑃛𑃢𑃖𑃝 𑃢𑃕𑃥𑃛𑃢𑃖𑃝 𑃒𑃦 𑃑𑃙𑃗 𑃢𑃔𑃢𑃗𑃕𑃥 𑃕𑃤𑃜𑃘𑃣 𑃢𑃖𑃤𑃡𑃢𑃖𑃙 𑃔𑃢𑃢𑃘𑃣. 𑃢𑃙𑃤 𑃣𑃑𑃤𑃙 𑃢𑃔𑃐𑃣𑃘𑃤𑃙𑃒𑃤𑃙 𑃥𑃛𑃢𑃜𑃙 𑃦𑃕𑃘𑃑𑃣. 𑃢𑃒𑃒𑃥𑃖𑃥𑃗 𑃢𑃒𑃦𑃜 𑃢𑃙𑃦𑃕𑃘 𑃜𑃤𑃝𑃢𑃤𑃑𑃤𑃙. 𑃢𑃙𑃤𑃙 𑃢𑃒𑃦𑃜 𑃖𑃣𑃙𑃔𑃢 𑃢𑃥𑃐𑃢𑃘 𑃐𑃢𑃙 𑃑𑃒𑃤𑃑𑃤𑃙. 𑃢𑃙𑃒 𑃒𑃤𑃜𑃦 𑃖𑃗𑃕𑃔𑃨𑃢 𑃕𑃖𑃙 𑃢𑃖𑃣𑃙𑃔𑃢𑃠𑃤 𑃒𑃢𑃝 𑃠𑃥𑃖𑃠𑃥𑃖𑃙𑃢𑃒𑃢𑃙 𑃔𑃥𑃗𑃘𑃤𑃙𑃠𑃤. 𑃓𑃢𑃘𑃢𑃟 𑃒𑃥𑃢𑃒𑃙 𑃟𑃙 𑃑𑃢𑃖𑃣𑃙𑃔𑃢 𑃢𑃥𑃐𑃢𑃘 𑃢𑃔𑃦𑃦𑃗 𑃘𑃤𑃗𑃙 𑃒𑃦𑃘𑃘𑃤𑃙 𑃖𑃣𑃙𑃔𑃢𑃙 𑃢𑃖𑃒𑃝𑃤𑃧 𑃣𑃘𑃘𑃤𑃙 𑃖𑃣𑃙𑃔𑃢𑃙𑃠𑃤 𑃢𑃖𑃢𑃙𑃔𑃢𑃘𑃤𑃗 𑃕𑃙𑃘𑃣 𑃡𑃢𑃙𑃣𑃑𑃤𑃙. 𑃖𑃣𑃙𑃔𑃢𑃙𑃠𑃤 𑃟𑃤𑃙𑃑𑃘𑃦𑃔𑃒𑃢 𑃢𑃔𑃖 𑃟𑃣𑃔𑃢 𑃝𑃣𑃗𑃙 𑃢𑃗𑃢𑃙 𑃑𑃤 𑃠𑃥𑃖𑃠𑃥𑃖𑃙𑃢𑃙 𑃐𑃥𑃐𑃥𑃘𑃠𑃤 𑃒𑃥𑃐𑃒𑃙 𑃣𑃝𑃑𑃥𑃥𑃘 𑃢𑃦𑃙𑃖𑃣𑃙𑃔𑃢𑃙 𑃢𑃐𑃗𑃟𑃢𑃙 𑃘𑃒𑃒𑃢𑃒𑃙 𑃘𑃒𑃒𑃢𑃒𑃘𑃣 𑃟𑃣𑃔𑃢𑃝𑃣𑃗𑃙 𑃐𑃦𑃙𑃣𑃑𑃣𑃙. 𑃒𑃦𑃥𑃝𑃥𑃒𑃙 𑃢𑃥𑃛𑃢𑃐𑃦 𑃢𑃒𑃒𑃤𑃤 𑃠𑃥𑃖𑃣𑃑𑃤𑃙 𑃥𑃝𑃥𑃒𑃜𑃥𑃗𑃙 𑃖𑃣𑃙𑃔𑃢𑃙𑃠𑃤 𑃢𑃕𑃥𑃗𑃕𑃥𑃙𑃠𑃤 𑃤𑃜𑃘𑃤𑃙𑃠𑃤. 𑃒𑃥𑃢𑃒𑃙 𑃦𑃕𑃘𑃣𑃑𑃤𑃙 𑃘𑃖𑃤 𑃟𑃙𑃢 𑃙𑃤𑃙𑃠𑃤 𑃢𑃙𑃝𑃥𑃟𑃟𑃥 𑃖𑃢𑃤𑃘𑃤𑃙𑃢𑃡𑃣𑃙 𑃔𑃣𑃙 𑃑𑃦𑃕𑃘𑃙 𑃢𑃒𑃦𑃧 𑃐𑃥𑃔𑃨𑃢𑃔𑃖 𑃢𑃖𑃣𑃙𑃔𑃢 𑃡𑃖𑃘𑃣 𑃛𑃢𑃗𑃑𑃢𑃤. 𑃣𑃑𑃑𑃤𑃗 𑃕𑃢𑃖 𑃔𑃣𑃘𑃤 𑃖𑃣𑃙𑃔𑃢𑃙𑃠𑃤 𑃔𑃤𑃠𑃤𑃣𑃑𑃤 𑃔𑃠𑃤𑃗 𑃑𑃤𑃔𑃟𑃥 𑃘𑃤𑃠𑃤. 𑃔𑃤𑃧𑃑𑃣 𑃔𑃟𑃥. 𑃒𑃥𑃢𑃒𑃙 𑃢𑃠𑃥𑃖𑃣𑃑𑃤𑃙 𑃢𑃖𑃣𑃙𑃔𑃢 𑃑𑃥𑃖 𑃕𑃤𑃤𑃜𑃘𑃣. 𑃒𑃥𑃢𑃒𑃙 𑃖𑃣𑃙𑃔𑃢𑃙𑃠𑃤 𑃢𑃕𑃥𑃗𑃕𑃥 𑃕𑃙𑃘𑃣 𑃜𑃢𑃗 𑃕𑃢𑃖 𑃠𑃥𑃖𑃢𑃤 𑃕𑃢𑃖 𑃦𑃕𑃘𑃑𑃣. 𑃟𑃙𑃑𑃢 𑃔𑃤𑃙𑃙𑃢 𑃖𑃗𑃕𑃢𑃔𑃨𑃢 𑃕𑃖𑃙 𑃢𑃐𑃦𑃖𑃙𑃔𑃤𑃠𑃤 𑃖𑃦𑃙𑃘𑃦𑃤 𑃖𑃙𑃝𑃢 𑃔𑃦𑃜𑃘 𑃢𑃔𑃨𑃥𑃘𑃢𑃠𑃤. 𑃔𑃦𑃜𑃘𑃙𑃠𑃤 𑃢𑃖𑃝𑃤 𑃢𑃔𑃔𑃢 𑃢𑃒𑃖𑃣 𑃑𑃢𑃤 𑃕𑃢𑃖 𑃕𑃖𑃢𑃗 𑃑𑃘𑃧𑃒𑃢 𑃐𑃥𑃨𑃔𑃢 𑃒𑃣𑃑𑃨𑃝𑃘𑃢𑃤𑃑𑃥 𑃡𑃖𑃘𑃣 𑃖𑃣𑃙𑃔𑃢𑃙 𑃢𑃕𑃥𑃙𑃕𑃥 𑃕𑃙𑃣𑃑𑃤𑃙. 𑃦𑃕𑃘𑃣𑃑𑃤𑃙 𑃒𑃗𑃐𑃢𑃔𑃖 𑃢𑃖𑃣𑃙𑃔𑃢 𑃡𑃖𑃘𑃣 𑃖𑃣𑃙𑃔𑃢 𑃠𑃣𑃘𑃙 𑃢𑃔𑃤𑃡 𑃘𑃒𑃤 𑃕𑃢𑃖. 𑃘𑃢𑃤𑃑𑃨𑃥𑃙 𑃑𑃣𑃝𑃣𑃑𑃤. 𑃢𑃤𑃗 𑃢𑃖𑃣𑃙𑃔𑃢 𑃔𑃣𑃙 𑃠𑃣𑃘 𑃠𑃣𑃘𑃔𑃖 𑃕𑃢𑃖𑃘𑃣 𑃢𑃐𑃣𑃗 𑃐𑃣𑃗 𑃐𑃣𑃑𑃤𑃙 𑃢𑃟𑃤𑃔𑃔𑃨𑃤𑃡 𑃖𑃣𑃙𑃔𑃢𑃙 𑃢𑃥𑃐𑃢𑃘 𑃢𑃝𑃥𑃒 𑃙𑃣𑃑𑃤𑃙 𑃢𑃒𑃥𑃢𑃒 𑃢𑃔𑃕𑃤𑃧 𑃙𑃢𑃣𑃑𑃤𑃙. 𑃢𑃒𑃦𑃧 𑃐𑃥𑃨𑃔𑃢 𑃔𑃥𑃖 𑃢𑃘𑃥𑃢𑃔 𑃒𑃢𑃑𑃑𑃤 𑃢𑃙𑃥𑃨𑃔𑃣𑃗𑃙 𑃐𑃥𑃒 𑃠𑃢𑃢𑃙 𑃐𑃥𑃒𑃠𑃢𑃘𑃣 𑃢𑃐𑃗𑃟𑃢𑃘𑃤𑃗𑃙 𑃛𑃔𑃘𑃥𑃔𑃘𑃠𑃤. 𑃟𑃙𑃑𑃢𑃐𑃘𑃤 𑃒𑃥𑃢𑃒 𑃐𑃒𑃒𑃤𑃡 𑃢𑃓𑃢𑃘𑃢𑃟𑃤 𑃝𑃑𑃔𑃘𑃤. 𑃢𑃔𑃥𑃗 𑃔𑃖 𑃙𑃣 𑃑𑃤𑃙 𑃢𑃙𑃥𑃔𑃨𑃣𑃗 𑃐𑃝𑃥𑃧𑃘𑃤. 𑃖𑃗𑃕𑃔𑃨𑃢 𑃕𑃖𑃙 𑃢𑃟𑃢𑃖 𑃒𑃢𑃝𑃤𑃠𑃤 𑃒𑃢𑃕𑃥 𑃖𑃙𑃝𑃢 𑃘𑃥𑃢𑃔𑃙 𑃡𑃖𑃘𑃣 𑃔𑃨𑃥𑃗 𑃘𑃣 𑃛𑃢𑃗𑃘𑃣 𑃢𑃝𑃢𑃙𑃣𑃒 𑃘𑃤𑃗𑃙 𑃤𑃜𑃘𑃣 𑃔𑃦𑃠𑃤𑃠𑃤.